تمثال الحرية بتنور الدنيا و المشهور بتمثال الحرية هو تمثال قدمه الشعب الفرنساوي كهدية للولايات المتحدة الامريكية سنة 1886.التمثال واقف بشموخ في ليبيرتي ايلاند (جزيرة الحرية) في مدخل المينا بتاع مدينة نيويورك علشان يرحب بالمهاجرين الجداد لامريكا و كمان يرحب بالامريكان اللي راجعين لوطنهم من الغربة. التمثال (المعمول من النحاس) هو رمز للصداقة الفرنساوية-الامريكانية و بيخلد الزكرى المئوية لتوقيع اعلان الاستقلال بتاع الولايات المتحدة عن بريطانيا. التحفة الفنية دي من تصميم المثال الفرنساوي فريدريك اوجوستيه بارتولدي اما المهندس اللي بنى الهيكل الداخلي للتمثال فهو أليكساندريه إيفيل ( مصمم برج ايفيل في باريس). التمثال عبارة عن واحدة ست لابسة روب و ماسكة في ايدها اليمين شعلة الحرية و في ايدها الشمال مساكة كتاب منقوش عليه باللاتيني 4 يوليو 1776 و اللي هو تاريخ الاستقلال الامريكي. على راسها لابسة تاج طالع منه 7 اشعة بترمز للسبع قارات بتوع العالم و هي واقفة على قاعدة مريعة التمثال نفسه طوله 46 متر من الرجلين لقمة الشعلة بس بيوصل ل 93 متر لما نضيف القاعدة. تمثال الحرية من اكتر الحاجات اللي بتميز امريكا كدولة و بتمثلها بقيمها و مبادئها.
الرمز
المظهر الكلاسيكي للتمثال (الروب الروماني و الصنادل و تعابير الوش) متاخد من الاهة رومانية قديمة اسمها (ليبيريتاس) و اللي كانت بتعبر عن التحرر من العبودية و القهر و استبداد الحكام. تمثال الحرية مش واقف جامد، على العكس، رافع رجله اليمين و بيستعد للحركة و التقدم لقدام بعد ما كسر واتخلص من القيود اللي كانت مكلبشة رجليه. الكتاب بيرمز للمعرفة و منقوش عليه تاريخ الاستقلال. الشعلة بتجسد معاني التنوير و الحرية.
التاريخ
المثال الفرنساوي فريدريك اوجوستيه بارتولدي
بارتولدي في زيارة ليه لمصر انبهر بمشروع قناة السويس اللي بيشتغل فيه صديق عمره المهندس الفرنساوي فيرديناند ديليسيبس،و اتخيل وجود منارة ضخمة في مدخل القناة ورسم سكيتش للتمثال اللي كان عبارة عن نسخة مصرية من الالهة الرومانية ليبيريتاس و خلاها تشبه الفلاحة المصرية شايلة شعله نار وموجهاها ناحية السما.بارتولدي اتقدم بمشروعه للخديوي اسماعيل باشا سنة 1867 و بعدين عمله شوية تعديلات و اتقدم بيه تاني سنة 1869 و في المرتين المشروع ما توافش عليه بسبب المشاكل المالية اللي كانت مصر يتمر بيها في الوقت دا. و بعديها عملته فرنسا( بتبرعات الشعب) و قدمته لامريكا هدية.
تواريخ مهمة
- العمر: 122 سنة (في 2008)
- تاريخ وضع حجر الأساس: 5 أغسطس 1885
- تاريخ نهاية أعمال الإنشائية: 22 إبريل 1886
- تاريخ نهاية التصميم في فرنسا: يوليو 1885
- تاريخ وصول التمثال لحد نيويورك: 17 يونيو 1885
- تاريخ الإفتتاح الرسمي: 28 أكتوبر 1886
- تاريخ إعلانه كأثر قومي: 15 أكتوبر 1924
- تاريخ إنضمامه للستة التراث العالمي: 1984
المقاييس
| الارتفاع من القاعدة للشعلة | 46 متر |
| طول التمثال بالقاعدة | 93 متر |
| من الكعب للراس | 34 متر |
| طول الايد | 5 متر |
| طول الصباع (السبابة) | 2.44 متر |
| طول الراس من الدقن لقمة لراس | 5.26 متر |
| من الودن للودن | 3.05 متر |
| طول العين | 0.76 متر |
| طول المناخير | 1.48 متر |
| طول الدراع اليمين | 12.8 متر |
| تخن الدراع اليمين | 3.66 متر |
| تخن الوسط | 10.67 متر |
| عرض البوء | 0.91 متر |
| طول الكتاب | 7.19 متر |
| عرض الكتاب | 4.14 متر |
| تخن الكتاب | 0.61 متر |
| ارتفاع القاعدة الجرانيت | 27.13 متر |
| ارتفاع القاعدة | 19.81 متر |
| وزن النحاس المستخدم في التمثال | 27.22 طن |
| وزن الحديد المستخدم في التمثال | 113.4 طن |
| وزن التمثال بالكامل | 204.1 طن |
